24

اسلام آباد یونائیٹڈ کو ایک اور نقصان، رومان رئیس بھی پی ایس ایل سے باہر

پی ایس ایل

تصویر کے کاپی رائٹ
PSL

Image caption

بیان میں کہا گیا ہے کہ ڈاکٹر کا مشورہ یہی ہے کہ رومان کو مکمل صحت یابی تک آرام کرنا چاہیے

پاکستان سپر لیگ میں شامل اسلام آباد یونائیٹڈ کی ٹیم کو ٹورنامنٹ کے بقیہ میچوں میں بھی اپنے فاسٹ بولر رومان رئیس کی خدمات حاصل نہیں ہوں گی۔

رومان رئیس ٹورنامنٹ کے ابتدائی مرحلے میں ہی کوئٹہ گلیڈی ایٹرز کے خلاف میچ میں فیلڈنگ کرتے ہوئے گھٹنا زخمی ہونے کے سبب ان فٹ ہو گئے تھے۔

تاہم امید ظاہر کی جا رہی تھی کہ وہ صحتیاب ہو کر جلد ٹیم کا حصہ بن جائیں گے۔

یہ بھی پڑھیے

انضمام الحق کھلاڑیوں کے ان فٹ ہونے سے پریشان

’عماد وسیم کی حالت اب ٹھیک ہے‘

آندرے رسل ان فٹ ہوکر پی ایس ایل سے باہر

اسلام آباد یونائیٹڈ کی جانب سے منگل کو جاری کیے گئے ایک بیان میں کہا گیا ہے کہ ٹیم کے فزیو ایرل ایلکاٹ رومان کی چوٹ کا معائنہ کرنے والے ڈاکٹر سے رابطے میں تھے اور وہ اس نتیجے پر پہنچے ہیں کہ اگرچہ رومان کی حالت میں بہت بہتری آئی ہے ان کا گھٹنا بولنگ کرتے ہوئے زیادہ وزن نہیں سہار رہا۔

بیان میں کہا گیا ہے کہ ڈاکٹر کا مشورہ یہی ہے کہ رومان کو مکمل صحت یابی تک آرام کرنا چاہیے۔

اسلام آباد یونائیٹڈ کا کہنا ہے کہ اسے افسوس ہے کہ رومان پی ایس ایل تھری کے بقیہ میچوں میں ٹیم کے ساتھ نہیں ہوں گے لیکن ان کا آرام کرنا ہی درست فیصلہ ہے۔

تصویر کے کاپی رائٹ
Mark Metcalfe

Image caption

رومان رئیس سے قبل اسلام آباد یونائیٹڈ کو آندرے رسل کے ان فٹ ہونے کا نقصان اٹھانا پڑا تھا

رومان رئیس اسلام آباد یونائیٹڈ کے وہ دوسرے کھلاڑی ہیں جو زخمی ہو کر پی ایس ایل سے باہر ہوئے ہیں۔

اس سے قبل 29 سالہ ویسٹ انڈین آل راؤنڈر آندرے رسل ہیمسٹرنگ کی تکلیف کے سبب پاکستان سپر لیگ چھوڑ کر چلے گئے تھے۔

اسلام آباد یونائیٹڈ کے ڈائریکٹر کرکٹ اور بولنگ کوچ وقاریونس نے کھلاڑیوں کی فٹنس کے معاملے پر بی بی سی اردو سے بات کرتے ہوئے کہا تھا کہ چونکہ ٹی ٹوئنٹی تیز فارمیٹ ہے لہذا کھلاڑیوں کے ان فٹ ہونے کا خطرہ موجود رہتا ہے۔

ان کا کہنا تھا کہ رومان رئیس اور آندرے رسل کا ان فٹ ہونا یقیناً اسلام آباد یونائیٹڈ کے لیے بڑا نقصان ہے لیکن وہ پرامید ہیں کہ جن کھلاڑیوں کو ابھی تک موقع نہیں ملا وہ ملنے والے موقع سے فائدہ اٹھائیں گے۔



Source link

اس خبر پر اپنی رائے کا اظہار کریں

Leave a Reply